滿意得很

日期：3月21日

地點：麻布茶房

是次消費：約$140

今晚和朋友去旅行社交團費，完成後便去食埋晚飯才回家。

我都幾鐘意去麻布茶房食飯，一來這裡食客偏少，地方闊落舒適，和朋友吹水都可以坐耐少少，二來雖然人均消費都百幾元，但食物份量亦有返咁上下，絕對食得飽﹗

之前試過雞飯﹑牛肉飯，今次當然試新野，豬肉雞蛋泡菜丼都幾特別呢，我喜歡麻布的定食會跟上數碟小菜，很豐富，今次有汁煮蘿蔔蓮藕，酸蘿蔔，酸黃豆及枝豆煎蛋，除了那件煎蛋鹹到吃不到之外，其餘小碟都被我清碟了﹗那碗蛋絲清湯其實我幾鐘意飲，特別是留在飯後飲用可清下味蕾及帶著油膩的口腔。

豬肉是瘦肉片，不含肥肉，很合我心意，雖然是瘦肉但肉質都幾軟淋，泡菜切細片，份量有不少，蛋絲就是滑蛋那模樣，混在肉和泡菜裡，將泡菜﹑蛋連同甜醬汁撈起，令飯粒惹味起來就令我吃不停口了。

定食不跟飲品的，但可以以$18加普通飲品或$28加特飲(奶昔除外)，之不過餐廳有提供熱綠茶，我超鐘意飲，所以可以將飲品錢轉移到甜品那裡去。(哈)

友人試了我推介的熱抹茶丸子紅豆湯，不過她話好甜好甜，我見碗內的紅豆量都幾多，可能導致太甜了吧﹖(因上次我食這味就覺得甜度是剛好呢)

抹茶芭菲賣相真是靚一靚，看到都興奮﹗生果有蜜柑﹑橙及圓形那粒，原來全都是罐頭水果，哇，好重糖水甜味，真的可以忽視... 

不過，芭菲的主角當然是雪糕喇，牛奶雪糕充滿濃郁的奶味，香滑得很，超正點﹗加了抹茶漿，增添抹茶的甘苦，好味，那球抹茶雪糕超好食啊，濃濃的抹茶味，兩款雪糕都是大大份，食到超飽﹗