幾好玩的韓燒

日期：7月26日

地點：OPPA韓國燒肉店 
是次消費：$156

計劃周日會出街食所以早幾日已搜尋定有什麼想吃，見自己都好耐都無食燒烤物便選擇旺角的OPPA韓國燒肉店。

順便打電話去訂位，問清楚肯定到7點30pm前結帳可以有全單8折優惠，於是就訂燒肉店每天營業時間即5點30pm。

5點10pm我們已到餐廳於是在門口等下，順帶一提門前放有六張櫈供等位人士坐住等，都幾細心。

門口開始有條小隊出現，於5點20pm有位女店員拿著點名簿出來然後開始叫人入去，點好名後再帶我們進去。店員不會死涸涸等到夠鐘先開工，處事具彈性。

原來餐廳地方不大，左邊有四張細枱而右邊有四張大枱，這裡需要搭枱的不過兩個人都可以佔據到半張大枱，坐落不會覺得擠迫。

剛坐下已經有男店員快速地送上一堆"物資"，包括有凍粟米茶﹑甜甜海帶﹑幾辣的泡菜﹑酸而爽脆的白蘿蔔﹑麻香大豆芽及新鮮生菜，全部都是任食任飲，所以今餐我沒有點菜食，因為淨食這批瓜菜都足以抵返每餐所需的蔬菜量。(重點：又慳返一百幾十喇)XD

男店員再將碎泡菜﹑魷魚粒及蛋漿倒入鐵盤的長條型內，等雞蛋變得漲起來及收汁就吃得了﹗好重泡菜味，而外邊脆脆地好似食緊雞蛋仔呢~﹗@@

豬肉和牛肉有最多選擇反而雞只得三款，不過價錢來說是雞肉最平，見到隔離枱那碟雞肉堆到好滿都是$78認真抵食呀，最估不到是蔬菜類都有很多款供應呢。

懶得想就點牛拚盤，$338包括有牛肩肉(左上)﹑和牛(左下)﹑牛舌(右上)及牛肋骨(右下)，份量是意料以外的大舊﹑大件及大份﹗相信三人食一盤都足夠矣~

熱盤是打斜放的，方便油汁流出去，燒的時候不會出現問題，盤放得好平衡呢。熱力好勁肉都好快熟，將燒好的肉加少少配菜再以生菜夾住包起一個菜球，然後學韓國人食：大大件直塞入口腔，食法豪邁又過癮﹗

最好吃的是和牛，牛味最濃，燒到剛熟即時送入口，口腔會感覺到肉的嫩滑；而牛肩肉也不好燒到太乾，乾了就會無哂味道，剛剛熟的時候是肉汁最豐盛的，有肉味外再加上醬汁甜甜地，是第二好吃。而牛肋骨就有著不少筋，肉偏硬，我覺得不太好食；最估不到是牛舌是完全沒味道，食之無味，棄之可惜，好在每人兩塊都哽得落。

男女店員都是香港人，沒有OPPA啊XD，中途可以請店員來清潔鐵盤，他們會用鐵剷剷走"燒焦粒粒"再用生菜抹乾淨塊板。服務都算不錯，就算咁忙但都保持良好的態度，而他們有時間就會過來幫手燒野食，還會教你點燒才是最好。

不過店內的抽氣系統就麻麻地，我感覺手腳臉都越來越油淋淋，用濕紙巾都抹不掉，而離店後好清楚聞到自己充滿"燒肉味"。

店員要求我們在七時還枱其實時間是足夠有餘，而食物有八折不過加一跟原價計。

魚旦與辣醬

日期：7月26日

地點：林昌記

是次消費：$10

參觀完歷史博物館的展覽後，行去火車站搭車期間醒起這商場內有間有名魚旦店，既然轉個彎就到便去買一杯試試。

笑容滿臉的老闆見到我們便打起招呼來，相當親民。

經老闆細心介紹下我們就買一杯大魚旦$20兩人分，因為大杯可以做到雙拚，原味魚旦拚咖哩魚旦，魚旦SIZE一口一粒，雪白無暇，光滑飽滿，食落好爽口，但魚肉味道略淡，主要自來醬汁，咖哩味道不濃，反而花生香味較突出。

老闆推介叫我們試這辣醬，我答我不吃得辣啊，老闆說就是不吃得辣都可以吃到哦。見老闆這樣好客我就不客氣喇﹗

估不到此辣醬真的不辣，但會否覺得好奇怪辣醬會不辣，哈哈，應該點說好，這醬好香好香，老闆吩咐精華就是底部的渣，我吃到好似有蝦米﹑有蒜粒，相當美味，類似食走辣XO醬的感覺，不同的是林昌記辣醬毫不油膩，反而越食越想食，配原味魚旦一齊食實在是無得彈呀﹗

老闆見我由肯食到讚繼而要添食辣醬的動態，還提我不夠食再過來拿多點，不用怕羞，實在是一位貼心又大方的老闆。

當跌錢好了

日期：7月26日

地點：新派素食

是次消費：$129.80

從餐廳周網站中發現一間印度菜素食餐廳，於是便上網查一查它。原來閒日中午會提供自助餐，而星期日就有BRUNCH BUFFET，價錢$118比餐廳周的午餐更平，於是拿拿聲在周日去試了。

BUFFET時間是11點45開始，我們在11點40便到餐廳，中途發生了開錯門事件而令女印度服務員A提早開門給我們入去坐到夠鐘，經我問清楚下原來12點才正式開始。

餐廳地方都幾大，光猛新淨，衛生程度都幾好。見沒有服務員帶位，我們便隨便找位置坐，因冷氣好凍加想近廚得食，我們就坐近食物的位置，如非我眼角見到有個陰影郁郁下，我都不知道女印度服務員A在遠處一直監視我們更對住我們手指指示意要我們坐返出D...(咁點解你又唔帶位呢﹖)

坐左陣，我去看看餐廳的時鐘，見12點都未可以開動，我出去問女印度服務員A，她手指指示意要等所有食物搬出來可以開動，等到餐廳時鐘顯示12點10，聽到女印度服務員A不知道說什麼後我們才可以出去取食物。(其實餐廳不如將BUFFET時間改去12點15吧，除了令食客不用白等亦可以避免員工要提早招呼客人。)

食物選擇較少，兩轉已經食齊所有食物了。

左邊是有紫洋蔥及三色椒沙律，加入辣汁，味道不錯。右邊是無加入任何醬汁的蕃茄﹑紫洋蔥及生菜，蔬菜樣子都新鮮。

左邊：蒸糕，就好似白糖糕但無咁甜；

中間：不甜的炸冬甩，幾好食；

右邊：酸辣湯，友人試了半碗便立即叫我不好試，因為超辣。

左邊：雜菜天婦羅，炸漿加入了黃咖哩，令味道無咁單調，不過蔬菜炸到淋劈劈，稍為遜色；

右邊：素菜春卷，雖然淋了少少，但不算油膩而且味道清新，岩我。

大堆頭炒物，有椰菜花﹑羊肉卷(?)﹑豆干﹑炸麵包(?)等，味道不辣又不鹹，很奇怪的味道，絕不討好，當中的羊肉卷(好硬，食落有渣)﹑豆干(好油)﹑炸麵包(好油好膩)，幸好我每樣拿了一件仔，但這三件頂唔順食剩半粒，約1吋，事後被經理責怪更被全店員工以黑臉對待。(詳見後話)

甜咖哩，內有豆腐/豆干，淨食都易入口，不會太重口味。

香草炒薯仔，薯仔粉腍，味道香口，很好吃。

青豆咖哩，甜甜地，都不錯呢。

好似肉醬意粉的"肉醬"咖哩，味道濃香，這個用來撈飯食是好正的。

印度飯，飯粒帶長，質感較硬，無飯香，最好當然是混入各款咖哩汁食用。

以為是南瓜蓉原來是椰子絲加入大量糖水，甜到暈...

煉奶浸麵包球，好甜好甜...甜到暈升級...

左邊：飯後水果只有西瓜；右邊：甜品枱上放了此碟沙律(﹖)，瓜粒菜粒加脆脆片，味道清清地，幾好吃。

期間女印度服務員A過來問我們飲什麼及要不要麵包﹖自助餐只包一杯飲品我們都要了芒果lassi，芒果味濃，帶著自然果酸更為吸引，而甜度剛好，整體是好好喝﹗

我們以為只得Naan但原來另有一款叫Dosa的捲餅，長柱體，餅皮薄脆，包住咖哩薯仔，相當特別呢，味道也好好；而Naan帶著微微蒜香，口感煙煙韌韌，我超鐘意食 Naan的所以忍不住添加了一盤。

後話：

以下是我所吃的第一轉及第二轉，自問都絕少浪費食物(除非難以下嚥就無計﹗)，所以去自助餐食我習慣是每轉取少許，不會大堆大堆頭，如果是好吃的再取過。

話說剩左半粒x3食物，難食到我食唔落，而經理埋黎收碟，佢問我"FINISHED?!"，我話"YES"，佢話"NOT FINISH!"，我知道食剩係我唔好但我接受唔到陣油膩味同食到成口渣滓(反正堆渣滓最後我都要吐出來)，我唔知"好難食我食唔落"英文係點講就是旦話"It is spicy, I can't eat..."，點知經理即黑哂臉怪責話"It is not spicy!"，佢企度唔郁我知道佢要睇住我食返呢3粒仔野，而我都無出聲，"DEAD AIR"一陣佢當住我面大大聲唉口氣先肯收走隻碟。

之後我地得到既係零服務，水杯無哂水見到又唔加，仲要受住經理同幾位女印度服務員對住我地黑口黑面(查實女印度服務員A的態度都好差，開頭已經對住我地黑面，依家更黑咁解﹗)，大約在12點15餐廳有九成滿，全部係當地同鄉，見住經理同幾位女印度服務員對同鄉客人有講有笑，我堅唔服氣，我唔需要你地全程對住我笑但至少唔好黑臉吧，最後求其食多轉，睇唔過眼佢地咁厚此薄彼就埋單﹗

食唔飽但滿肚氣﹗

與麵包激戰

日期：7月19日

地點： Café Moa Moa by Panash

是次消費：$118.80

本來計劃去香積廚食自助午餐，但摸門釘，看到通告才知道星期日改返做休息日。於是轉場去就近的荃灣廣場食麵包放題。

11點正入去，八個麵包籃都在飽滿狀態，早食早享受。

牛角酥﹑洋蔥包﹑芝士包﹑蕃茄香草包﹑鴛鴦包﹑牛奶球﹑午後茶餅﹑小鬆餅﹑芝士條，因為要出現吉籃廚師才會換新一批/新款的麵包，不過這段時間食客不多，麵包去得好慢，所以在我的用餐時間90分鐘內都未有轉過麵包款式。(見到大約12點過後才開始有大量食客進場...)

牛角酥及洋蔥包最好吃，牛角酥相當鬆化，牛油味香濃而不膩；洋蔥包入面原來有煮熟洋蔥條，對於喜歡食洋蔥的我絕對是誘惑。

而我也喜愛這裡的蕃茄包，包身鬆軟再夾有不少香草粒，吸入黑醋更加味美。

芝士包及芝士條，兩者芝味濃厚，上次不見有芝士條原來這個很好吃，超脆，我食足四條才夠喉﹗

鴛鴦方包是牛奶跟咖啡，咖啡味好濃不太合我口味，而牛奶球則好甜，我有點吃不消呢，午後茶餅及鬆化可口的小鬆餅當甜品都可以啊。臨走前見到有少量朱古力蛋糕出現﹗濃到爆的朱古力，加入大量朱古力粒，勁好吃﹗點飽都要吞多兩件啦。

其實這裡的套餐都好豐富的，沙律/湯二選一，我喜歡選擇沙律，因為菜類都有不少，不會單一，加入少量酸汁，清新又開胃。餐湯就是羅宋湯，只有半湯碗，對比下沙律抵食好多呢，呵~

是日茶是西柚茶，每一杯竟然有四分一個西柚在內(!!)，無叫走糖幸好原來茶品的甜度是零，無添加夠健康，紅茶帶著微微西柚味道。

我們都要了每款$108的主菜，因沒有素食，我選了"較"少肉的炸雞柳蕃茄意大利粉，好彩雞柳得兩件，炸雞肉都幾鹹香，吃落都不錯呢。用了大大大大大量蕃茄去煮意粉，每淡都食到茄汁﹑茄蓉及茄肉，正斗都不得了﹗

友人選擇吉列豬扒配辣味薯條，哇，豬扒好大塊啊~~~不過豬扒不是厚切，但薄切也不是紙咁薄，豬肉鬆化，沒有肥膏但吃落又不會死實實，外面的炸層鬆脆不油膩，薄薄的包著豬扒，不多不少，並不似快餐店沾厚厚粉充大大塊的不良手法。

幼身薯條灑上七味粉，薯條可以走辣不過送菜時侍應話廚房忘記薯條走辣，她好有禮貌道歉及說可以再弄過，不過以免浪費就照要吧，我試了一條但真係好辣，好在朋友接受到，並沒有產生太多廚餘。

我反而主攻那碗"茄醬"，因為它不是蕃醬而是蕃茄蓉(!!)，OMG~淨食都無問題呀，好好味。

基本上你食十個八個麵包都會覺得有飽意，再KO一個全餐後...不是說笑，飽足大半日，每人百二元，抵玩啦﹗

彩晶軒進駐屋村

日期：7月11日

地點：彩晶軒

是次消費：$124

想不到彩晶軒會在屯門開店，而地點是離我家不遠的友愛商場，實在方便呀，哈﹗

六月尾開業，到今日已忍不住要快快幫襯去。周末早上要等位，十點半等到十點五十五分，如果在星期日應該會等得更耐吧﹗

登記入座時知客會問你飲什麼茶，然後就入埋機，咦，很有趣的情序﹗

人數小的話是需要搭枱，可能我太耐無去彩晶軒飲茶了，想當年在荃灣店幫襯是絕無搭枱這玩意。

入座前已叫左茶，那我就邊看點心紙邊等，但呆坐十分鐘也未有侍應拿茶水過來，心感奇怪。唯有再叫待應開茶，她應左你又走去做其他事，然後我又叫經理開茶，最終由另一位侍應奉上茶壺來。心想，其實...知客問飲咩茶的動作是否"廢"的﹖

過左十點半已經是正價時段，但食物價錢沒有我預期中貴﹗食物款式比起好多酒樓來的多，而且有不少素菜選擇，很不錯。

手拍小青瓜$38，青瓜爽甜多汁，切一截截再拍爛好過無拍，生蒜泥超多，有加入鎮江醋不過酸味主要來自白醋，可是油落得重手，如果是麻油都還可以，但食落似生油。

不知幾時開始點心店及酒樓都有漢堡包食，加上細細個食多個都不會太內疚。青芥脆蝦漢堡仔$26.8，非常可愛，友人不知道點心都有這味兒所以覺得好過癮。

炸蝦餅香脆，內裡足料，沙律醬加入少量芥末，刺激之餘也減底食炸物的油膩感，上下兩片麵都烘到脆一脆，整體是美味的﹗

我以為冰耳准山餃$26.8是素菜但原來是有肉類，宗教素食者要小心了。餃子頂沾有一排蟹子，外觀上加添精緻，餡料以准山有最多，切得厚粒夠咬口，冰耳是否雪耳來呢﹖但我食不到有雪耳...加有豬肉令餡料油份加重，其實此味可以不加肉，反而令味道更為清宜呢﹗

友人話要吃粉麵飯於是試下幾特別的喇沙海鮮燴烏冬$78，用碟為數量詞我不禁起了懷疑，喇沙不是湯來嗎﹖以碟上咁奇怪﹖...

等了30分鐘才知道真相，原來是喇沙汁撈烏冬...噢~~怪不得用碟上，不過我未吃過這款式，都算幾有創意。烏冬有兩個麵餅的份量，勉強夠我們食，喇沙汁甜而不辣，加有椰汁添加椰香，而海鮮有魷魚﹑帶子﹑大蝦及桂花蚌，算是豐富啦。不過試過就算，始終我喜歡湯麵類。

最後加單入了數款甜品，香芒滑布甸$12，布甸淋劈劈，好稀，口感超怪，就好似食淋左的凍燉蛋。(打冷震)

北海道牛奶乳凍$8就正常，奶凍香滑，牛奶味濃，不太甜，超正﹗桂花椰汁紅豆糕$8也不錯，桂花糕清香，而紅豆糕足料夠味，但兩者沒有黏住，變相分開食。至於友人的陳皮椰果紅豆沙$8等成20分鐘見出現...眼見到紅豆有好多，不過份量得幾啖。喜歡食甜品就叫多幾樣試啦，反正每款都好平。

場內侍應人數非常不足，經常性不見有人出現，所以要給少少耐性等運到。眼見地毯/枱底留有不少紙巾﹑牙簽等垃圾，開業半個月就攪成咁，相當神奇﹗

由於出菜比較慢不知不覺都坐了兩個鐘，如果趕返工或趕下場而在這裡飲茶的確要在時間上作出預算。