ⓐⓎⓤ✐の無聊分享✐: 百分百餐廳姐妹店

日期：5月3日

地點：意樂餐廳

是次消費：$68

自樂亭在2月底結業後，好快地在4月底就有一間新餐廳開張了﹗原來是已經有幾間分店的意樂餐廳，看看裝修格局及餐牌設計覺得非常好熟面，即時想起是幫襯過不少次的百分百餐廳，應該是姐妹店沒錯了吧﹖

假期期間幫襯新開餐廳要等位當然是常識吧，門前放有一部自助取籌機，很方便。

大約等了15分鐘就入得，地方不大，位置間都幾迫夾。室內空氣不流通，冷氣又不夠，坐坐下熱到我爆炸，而且見暈，於是問店員可否調位﹖店員聽完就走出去後門，突然有陣陣涼意吹來...原來是沒有開冷氣...但不久有工程人員檢查機電又將冷氣熄了，令我要邊流汗邊食飯。

假期午餐定價不算高，但內容不太吸引，當然亦有散叫的食物，雖然散點價錢不算貴但我好熱好想飲凍野，見一杯凍飲差不多二十元，還是午餐有野飲跟就著數好多。

妹妹吃的是秘製咖哩牛坑腩小鍋珍珠飯$47，估不到牛腩多過白飯，以份量計當然好抵食啦。牛腩煮得幾軟淋，咖哩相當香辣，實在不錯呢。伴菜有瓜有菜有炸茄子，一大堆，有誠意。

而我吃的烤雞茄子百里香忌廉焗珍珠飯$45，鐵兜看似細細個原來內藏飯量是有不少的﹗

我主要想食的茄子只有兩小片(哭)，但烤雞就有好多件，雞肉嫩嫩的，味道較淡，忌廉汁香而不膩，用來撈飯及配雞肉的話就更為平衡，珍珠米比起一般用的香米有嚼勁，我是第一次食珍珠米焗飯，感覺幾得意。

另外加了小食巴馬臣芝士焗蒜蓉包$14/2件，蒜蓉醬濃香不過鹹，配以芝士，香香脆脆很好吃。

午餐跟熱飲，因場內好熱，我們都飲凍，凍檸茶+$3，凍檸蜜+$3，凍飲好大杯，加3元都抵飲。我想食菜再+$6有日式胡麻田園沙律，份量不少，用了幾款生菜，不單一，蔬菜新鮮，沒有苦味，還有紫洋蔥，大愛﹗

日期：5月11日

是次消費：$31

今早本想去稻香飲茶，不過中途見到意樂就去看看早餐是有什麼食﹖發現到"鮮雜菌蕃茄湯通粉"，於是便衝入去了。XD

麵餐通粉餐都可以加$3多一片蒜蓉厚多士，當我杯凍檸茶及多士來到後，店員收到廚房通知話今早沒有雜菌供應...店員便叫我轉其他餐，因飲品已給我喝了幾啖唯有硬著頭皮轉餐吧，但我不想吃肉唯一只有麥皮餐是理想選擇，包括一碗細無糖蛋白麥皮，兩隻煎雙蛋配半件蒜蓉厚多士，而原先另加$3多士是不可以退，唯有照要。

麥皮好稀身，味道好淡，不過多士好正，首先厚多真的好厚 XD，烘到外脆內軟，蒜蓉醬夠香濃，吃得津津有味。