刀削麵真的好"削"

日期：2月7日

地點：一品刀削麵

是次消費：$55.00

此店子就在我公司附近，雖然開了有好幾年，不過我一直都未去試，因逢午飯時間都有一大班人在等位，我自己就不太鐘意等位，更何況是在上班的放飯時間﹖

今天好早就食早餐，到下午完了興趣班就饑腸轆轆，決定要吃一餐豐富飽肚的。經過一品門口見到入面沒什麼食客，那擇日不如撞日，立即衝入去了﹗

店子非常狹窄，我順手坐門口旁邊的位，但當有人出入時，外內的對流風就猛吹埋身，感覺不好。聽到隔離枱的對話先知道假日沒有下午茶餐，那就散點吧。

見店內只有一名穿水靴的男生在專注在他的手機屏幕之上，然後我叫一聲"唔該"，他眼角啤啤我，然後才動起身子過來幫忙落單...

我對涼拌青瓜$20好有興趣，我先問一問此味會否好辣﹖(因這裡大部份小食都是"麻辣"為主)，他板起面說"你食得唔食得生蒜呀﹖"，他說得麼"明白﹑清楚"，我就照要一碟好了。

份量有不少，青瓜是拍出來的，青瓜新鮮，清脆多汁，部份醋汁都有醃於青瓜肉內，生蒜蓉下得好多好多，我自己好鐘意食生蒜所以吃得好過癮。

本來諗住要碗上湯刀削麵$26，不過好似好怪，唯一素食的齋春卷刀削麵$30就是我的選擇了。等了幾分鐘麵到了，啊，超大碗呢﹗

湯底都幾好味(牛骨湯?)，可惜刀削麵的質感就好"削"，太軟淋及糊口了，比預期之外的遜色。(以前我曾在荃灣及元朗的刀削麵麵店都吃過刀削麵，它應該是煙韌﹑富彈性的)

齋春卷有四條，入面包有少少椰菜絲及蘿蔔絲，食落不算太油膩。

每碗都加$5有一杯豆漿，冰凍可口，不過好細杯~

再來幫襯機會不高，但如有下次我會選擇食上海年糕或蘭州拉麵。