隱藏版漬物

日期：3月31日

地點：丼丼屋食堂

是次消費：$68.2

今午走到市中心食午飯，為的是試下丼丼屋的"平日限定超值之選"，原來另有"午市精選定食"，衝量過後，還是覺得午市精選定食較為抵。因前者需要另加錢才有餐湯及沙律，後者價錢已包餐湯﹑沙律﹑前菜及漬物，相差都只是數元。(注：我以自己想吃的食物款式及價錢作比較)

以往要飲水就要靠服務員斟，現在一個個水壺放正客人前面，絕對方便我這個"水怪"﹗而壺內是裝有暖水，更為貼心。

我不太肚餓，選了較"輕盈"的泡菜豚肉烏冬定食$62，配套有前文提到的沙律﹑麵豉湯﹑前菜﹑漬物及飲品，我飲凍檸茶。

沙律雪到凍到不得了，蔬菜也不見得新鮮，青瓜片都抽到乾；麵豉湯夠熱而味都幾濃，不錯；前菜是冷掉了的炸海鮮餅，好彩還有點脆口。

泡菜豚肉烏冬味道中規中矩，不過泡菜只有數片...實在"名貴"...湯辣辣地都幾好飲，湯大大碗不過烏冬是迷你份量，如果本身是肚餓底相信KO此餐後應該要去''補貨"。

話說我看到餐盤內沒有跟來漬物，再三查看餐牌後便招服務員過來一問。"咦，我想問下呢個餐唔係跟4樣小食咩?"我拿起餐牌再指給女服務員看那圖片。

"嗯...好，咁你等等。"服務員轉頭回來，"係呀，烏冬定食係無漬物跟的。"

"啊﹖咁得意﹖但圖片又會SHOW有既﹖"我問。

"唔好意思，只有飯既定食先有漬物跟，烏冬定食係無..."

"哦，咁好喇。"

本想直接打去丼丼屋問，不過撞正熱線食飯時間，我反正不急諗住下午再打去查詢。直到我吃飯中忽然有位男服務員在我背後出現，再給我這碟東東...

"真係唔好意思，我補返一碟漬物給你先，因為頭先個同事唔太清楚，我同你解釋返丫，其實公司已經出左通告話烏冬定食係唔跟漬物，不過餐牌上的文字同圖都印錯左，但因為之前有唔少客都問過呢個問題，所以公司就有通知話如果有客人要求要返漬物，我地都會補返俾佢地。"

我心諗，這幾片丁點漬物值幾多錢﹖1元2元﹖一間大集團都要慳到咁盡﹖=.=...我即時見議服務員可以出張MEMO或溫提紙貼在餐牌上，以免再有食客誤會，萬一遇著激進派問起上來攪到嘈交就無謂啦。