舊日風味現今嚐

日期：6月7日

地點：叁去壹點心粉麵飯

是次消費：$72.5

想幫襯叁去壹有多年了，但自己好懶兼不熟路所以就...(哭)...怎料食友願意帶我去一轉，於是就趁今日天清氣朗的日子出發去﹗

由西營盤地鐵站行過去叁去壹原來只是幾分鐘，實在是超方便呢﹗

門外有數張小枱，但我不能像大叔們有如此強大的"耐熱力"，幸好我們一入去，店員大叔同我們講"呢張枱岩岩埋左單，等佢地走左就可以坐呢度喇"。

店內冷氣都有幾部，不算凍但至少不會覺得太熱，地方小小的店子放有兩大圓枱及四張二人枱，空間雖不闊落但只要大家將就將就都不成問題的哦。

坐下後，店員大叔問我們飲什麼茶，之後除茶壺外，也有一盤盤熱燙水連浸著的餐具。

紅底黃字的餐單，鮮明易看。最令我驚訝的是點心價錢實在抵到不能相信﹗

蟹王燒賣$14，純豬肉製造，肉鮮多汁，毫不油膩，份量足以食一粒都覺得足夠矣。

鮮蝦餃$14，餃皮夠哂煙韌，就算兩粒蝦餃黏在一起，夾開後兩方都不會破皮，蝦肉好鮮甜，是意外的鮮甜﹗很是好吃。

腸粉方面，我自己比較鐘意食齋腸$12，腸粉一看就知好嫩滑，食入口當然滑嘟嘟，可惜所用的豉油偏鹹，吃不到腸粉的米香。

然後有鮮蝦腸$15，蝦肉大大隻﹑爽脆有鮮味，認真不錯﹗不過下次食要記得落少少豉油就夠了。

食友想試埋牛肉腸$15，每條都包了一大劈牛肉，咀嚼時食到有不少粒粒馬蹄，爽口外也減底肉膩。

雞絲粉卷$14，少見的懷舊點心，薄薄的腸粉皮包住大大件豬肉條，肉餡有紅蘿蔔﹑木耳，吃落有點似潮州粉果的餡料味道，份量大到一人食一件都夠皮。

每餐纖維有灼油菜$16，大大碟，菜心嫩口，無渣。(豉油可以另上)

最後叫一碟家鄉炒米$37齊齊分﹗店員大叔話家鄉米粉是"好似星州炒米咁但唔辣既"，實物也是如此，配料特多：叉燒﹑雞蛋﹑火腿﹑青椒﹑洋蔥﹑芽菜等，即叫即炒，夠火喉，香氣四溢，引到口水都出。咀嚼米粉時的確食得出"好香"的味道，咪話不驚喜。

每位店員大叔年紀都不輕，但他們都充滿活力，賣力工作之餘也會與食客們打成一片，嘻嘻哈哈，非常快樂的。期間，有位店員大叔留意緊食友影食物相，他站在背後注專地看她手上的手機螢幕，這構圖很是有趣。

埋單時，白髮店員大叔走過來點數枱面上的碟數，我見他用手指默默算，算完又走去櫃台拿計數機出來，襟完說"145蚊丫"，他將計算機放好，我們正付鈔時，他又返櫃台取計算機出來，笑著說"都係等我計多一次先，(襟襟襟)，岩喇係145蚊，無錯"。

其實，他們真的好可愛。