29樓的好享受

日期：6月6日

地點：炊公館

是次消費：$198

一直以來我都想試Sorriso Italian Cuisine的半自助午餐，可惜星期六我都較難出去尖沙咀呢。直到近來在facebook看到炊公館的廣告，原來周一至周日有半自助午餐，價格不算貴，時間是1130至1500，不設餐食時限，實在吸引呢﹗(後尾上網查到原來炊公館前身就是Sorriso，又會如此巧合)

難得今個星期六有時間，於是早一星期就打電話去預定枱。

環境嘛，無可厚非實在是非常非常漂亮。

在預訂時我說明想坐窗邊，接線生說會盡量安排，最後如我所願。

今日天氣大好了，天空太美了﹗

半自助餐的食物款式並不是太多，基本都有沙律﹑冷盤﹑湯﹑麵包及甜品，如需飲品就額外加錢，其實每樣食少少食少少都夠飽的呢。

沙律方面，有吞拿魚雜菜沙律﹑薯仔紅蘿蔔沙律及凱撒沙律。雜菜沙律用上醋汁，配以車里茄﹑青瓜片﹑紫洋蔥及多款生菜，沙律色彩甚為豐富；薯仔沙律好好味，薯仔粉腍，只用少少沙律醬去撈，剛剛好，不會有可怕的沙律醬水問題。

凱撒沙律是自己配搭，配套齊全，有煙肉﹑麵包粒﹑芝士碎及凱撒沙律醬，可是生菜有陣苦味，我吃不消。前方放有松子仁﹑雞心豆﹑粟米﹑紅腰豆﹑青瓜﹑車里茄及西芹，倒入黑醋又可製作另一款沙律出來呢。

冷盤有雞絲粉皮及貢菜，哈哈，正合我意﹗貢菜帶少少辣度，質感爽脆，而雞絲粉皮的粉皮夠嫩滑，用上的芝麻醬相當濃香，超好味呀，最後忍不住用芝麻醬來撈菜食。XD

餐包有牛油包﹑香草包﹑多士及罌粟包，麵包好似不是自家制，因每個包都是扁扁的模樣，不過我都鯨吞了五個...對，我是包癡 XD。

粟米湯是粟米粒打碎後再煮，帶著奶香，都不錯。待到後尾時間見到換了另一款雜菜湯，當中有西芹﹑青瓜﹑三色椒以及大量蕃茄，勁足料，味道略為酸，如果紅湯早點出場我就可以用來沾麵包食了。

飲品方面，某幾款飲品在午市以優惠價作招徠，不過我覺得最抵飲就是$12任飲凍綠茶和柚子茶﹗綠茶是用綠茶粉沖，並不是用茶包沖，夠哂濃郁，而柚子茶就好淡口，我灌了六杯凍綠茶，清熱解渴，爽呀。

食到差不多時間便可以叫侍應上主菜，我們選擇最經濟的兩款。

海南雞飯，整個餐用一塊黑色木板呈上，好型﹗

雞肉份量都幾多，肉質香嫩，有著鹽焗的鹹香，都不錯呢。白飯並不是油飯(餐牌上已注明)，我就無什麼所謂，有得食就食啦。

而三種瓜夠酸夠爽脆，另配薑蓉﹑黑豉油及甜酸醬。

黑松露烤野菌配菠菜麵，野菌只有燒烤大蘑菇，用洋蔥炒過，份外好吃的。

菠菜麵就較為硬身，而黑松露味道好薄弱，食到最尾兩啖麵才吃出那陣松露香。

甜品有生果涼粉﹑腰果酥﹑士多啤梨奶凍及焦糖燉蛋。

涼粉已預先加糖水，甜而不膩，又夠凍，我吃了兩大碗。

這個焦糖燉蛋超好吃，蛋味好濃，加上少少焦糖，不過甜，正，平時我不太鐘意食焦糖燉蛋的但今次我鮮有地吞了四杯﹗

第一批奶凍是水汪汪的模樣，幸好有第二批出場，雪得夠凍，牛奶味濃，好味﹗

侍應們的處事態度﹑禮貌及對食物的了解度都取得滿分，在這裡我有一種賓至如歸的感覺。

所以用一個經濟價錢就可以有如此享受，絕對是超值。