美味回憶

日期：6月6日

地點：老趙越南餐廳

是次消費：118.00

在港威看過戲後就行去佐敦搵食，因好想食越南菜便去了老趙。雖然老趙在尖咀佐敦有幾間分店，但我個人偏好去老店。

第一次幫襯老趙，之前看食評知道等位是正常的事，不過今晚六點半去都可以直入，直到七點幾過後就全店滿座了。

枱上放有魚露一支，看色水是對版的，但以安全計先試口味，少鹹多酸，加上蒜粒辣椒絲，增加香味，正﹗正是我多年來食開的味道﹗

先來一人一飲品，朋友點選的咸檸檬七喜$30。

我飲椰汁木薯綠豆冰$26，椰汁香濃，甜度剛好，木薯製成條狀，食落軟身，綠豆煲到好淋，最驚喜是有海帶在內﹗

價錢雖貴但每餐都要有菜，蒜蓉炒時菜$58(生菜/椰菜/油墨菜)，椰菜吸盡蒜香，好味﹗

既然有好吃的魚露就一定要吃凍檬，香茅豬肉凍檬$52，豬肉充滿濃郁香茅味，肉質鬆軟，肥膏不多，可放心地吞食﹗檬粉下墊有大量青瓜﹑芽菜等，檬粉及蔬菜索盡魚露，吃起來酸酸甜甜又清清爽爽，絕對是夏日之選。

好耐無遇到自家製肥碌碌版的越南春卷$42了﹗內有冬菇﹑荀﹑蝦米﹑肉碎，豐富得很，春卷香氣迫人來，用一片生菜及少少九層塔包圍之，再沾上魚露，便是一道香口美食了﹗

最後再加添一份越式蒸粉包$28，熱騰騰的粉包子，內含材料和春卷差不多，將粉包浸在魚露中一陣，然後就大口大口地吃下去，滋味無窮，灑上乾蒜片及蝦米乾，令食味更添鹹鮮。

當年的屯門小巴黎的越式食物絕對是無得輸，我自己都食左十幾年，但幾年前開始已經走下波，變相都無興趣幫襯了...所以今餐能讓我重溫到旨日的味道，的確有點感動。