32元大滿足

日期：8月11日

地點：福祿壽健康素食 

是次消費：$32

知道福祿壽這間小店是從素食群組中看回來的，每次見到素友介紹福祿壽的大大份午餐都相當吸睛，可是自己鮮有會在星期一至六的中午時段在中上環啊...

因今早早上要出去灣仔幫老闆辦簽證，然後又要去上環辦車務，於是我就趁機去福祿壽食餐晏﹗(開心)

從群組中吸收了資訊就是午餐11am開始，12pm後開始要等位，所以如果是堂食就盡量在11點半前到達，最後我在11點半去到果然有不少人食緊飯了。

阿姐見到我便叫我隨便找個位就座，坐好我同阿姐點餐，之後便可以自己去取飯麵湯。廚房外分別放有一盤白飯﹑一盤紅米飯﹑一盤炒米炒麵炒河及一窩是日湯水，全是任飲任食的，絕對適合大食的我﹗

見到麵盤內有一隻煎蛋和數件蘿蔔糕，好彩看過素友講解，原來早市有賣剩的食物店方就會放在午市做埋任食，哈，竟然給我遇到突然有種賺了的感覺，呵呵﹗

每件蘿蔔糕都是超大片，雖然煎糕放在蒸盤中不過食落外表仍帶點點脆身，味道清淡，有少許蘿蔔絲，都算不錯哦。

店方每天都提供十幾款素菜，是次我試了雜菜薯餅及薑絲炒菜心，薯餅是薯蓉再煎香，內含少少菜絲，味道偏清淡，薯餅有四大片吃完這些都飽肚反轉了，而菜心鮮嫩無渣，帶少少薑味，好吃。

因為平時食白飯較多所以今次主攻炒麵及炒米，米粉味道較淡，質感較硬，而炒麵裡好多炒椰菜，麵條腍腍地不過勝在豉油味夠濃，好吃好多。

湯水是冬瓜雜豆湯，無油份，無下太多調味所以冬瓜味道好出眾，清潤無比，飲得喉嚨都好舒服。

用了半小時食了1.5碗麵及飲了3碗湯，食飽飽就放下32元，捧住個大肚腩行出門口。